Puerto Hurraco 2011: CORPUS 2011

LUIS CHAMIZO

COMPUERTA Corre'l tren retumbando por los jierros de la vía. Retiemblan los recios arcornoques qu'esparraman al reor del troncón las hojas secas. Juyen las yuntas cuando'l bicho negro, silbando, traquetea. S'esmorona un terrón, y el jumo riñe con las ramas d'encinas que l'enrean... Vusotros qu'ajuís pa no sé onde, no queändo'n los jierros ni las juellas; vusotros qu'asomaos a las ventanas guipáis las foscas y arrogantes jesas y las jondas colás con sus regachos y la tierra e labor enjuta y seria donde rumian su pan unos gañanes del coló de la tierra. Vusotros qu'atendéis a las lerturas y séis tan sabijndos de las cencias que quizás nus larguéis de carrerilla y en romances jazañas extremeñas que los nuestros ejaron sin contaglas endispués de jaceglas.

Vusotros, los que vais drento del bicho
que juyendo retumba y traquetea,
¿no sentís al pasá junto por junto
al mesmo corazón de nuestras tierras
argo asín com'argún juerte deseo
que s'eschanguen del chisme toas las rueas
pa queäros aquí, junt'a nusotros,
pa endurzá una mijina nuestras penas,
pa rumiá nuestro pan y p'ampaparos
en la sal del süor que nus chorrea?

Vusotros qu'atendéis a las lerturas
sin queär en los jierros ni las juellas,
qu'asina como'l tren vais por la vida,
retumbando y depriesa...

Si n'os podéis pará, meté pal bolso
este cacho e libreta,
y al pasá por aquí mirá pal cielo,
y endispués pa la tierra,
y endispués de miranos con cariño,
prencipiar a leegla;
porqu'ella sus dirá nuestros quereles,
nuestros guapos jorgorios, nuestras penas,
ocurrencias mu juertes y mu jondas
y cosinas mu durces y mu tiernas.

Y sus dirá tamién cómo palramos
los hijos d'estas tierras,
porqu'icimos asina: jierro, jumo
y la jacha y el jigo y la jiguera.

Y tamién sus dirá que semos güenos,
que nuestra vida es güeña
en la pas d'un viví lleno e trebajos
y al doló d'un viví lleno e miserias:
¡el miajón que llevamos los castúos
por bajo e la corteza!

Porque semos asina, semos pardos,
del coló de la tierra,
los nietos de los machos que otros días
trunfaron en América.

A LAS DOCI DE LA NOCHI(en Castuo)

A LAS DOCI DE LA NOCHI,
A las doci de la nochi, el mundu ya se salvó
que en el vientri de la Virgin, el Hiju de Dioh nació
Oh nochi más venturosa, Oh nochi que jamás pasa
Nochi de touh los tiempus
Nochigüena de touh los tiempus,
Nochigüena, nochi santa
Estribillo:
Nochi de alegri contentu,
del mayol placel y gloria,
cantemuh a la memoria,
del Divinu Nacimientu, Nacimientu.

Que humildá, qué abatimientu
comu lo anunció Isaihan
aquí ha naciu el Mesiah
para dal fiel cumplimiento
A redimil el pecau, que cometió el primel hombri
vieni Jesuh, no te asombrih al veli tan humillau
Estribillo:
Nochi de alegri contentu,
del mayol placel y gloria,
cantemuh a la memoria,
del Divinu Nacimientu, Nacimientu.

A unuh sencilluh pastoih
un Angil se apareció
leh ha dichu que en Belén
el Hiju de Dioh nació.
Celestiah jerarquiah, grandeza del Universu
astruh, de la región santa, bendecil a Intanti tiernu
Estribillo:
Nochi de alegri contentu,
del mayol placel y gloria,
cantemuh a la memoria,
del Divinu Nacimientu, Nacimientu.

Puerto Hurraco 2011

martes, 12 de julio de 2011

CORPUS 2011

No hay comentarios:

Publicar un comentario